2008թ. նախագահի ընտրություններում ընդդիմադիր թեկնածու Լեւոն Տեր-Պետրոսյանի նախընտրական շտաբի պետ, ՀՀ ԱԳ նախկին նախարար, այժմ՝ Շվեդիայում, Դանիայում և Նորվեգիայում ՀՀ արտակարգ և լիազոր դեսպան Ալեքսանդր Արզումանյանը «Մարտի 1-ի» գործով արդարացվել է:
Վճռաբեկ դատարանը ճանաչել է Արզումանյանի անմեղությունը առաջադրված մեղադրանքում՝ հանցակազմի բացակայության հիմքով։
Արզումանյանի վերաբերյալ գործը վերանայելու բողոք էր ներկայացվել՝ հաշվի առնելով այն հանգամանքը, որ ՄԻԵԴ-ը 2021 թվականի օգոստոսին «Ալեքսանդր Արզումանյանն ընդդեմ Հայաստանի» գործով վճիռ է կայացրել` ճանաչելով մարտիմեկյան իրադարձությունների ժամանակ նրա ազատության և խաղաղ հավաքներ անցկացնելու իրավունքի խախտման փաստը:
Հիշեցնենք՝ Ալեքսանդր Արզումանյանը 2009-ին մեղավոր էր ճանաչվել զանգվածային անկարգություններ կազմակերպելու համար և դատապարտվել հինգ տարվա ազատազրկման, ավելի ուշ ազատ էր արձակվել համաներմամբ։
