G7 գագաթնաժողովի առաջին օրը անդամ երկրների ղեկավարները հայտարարել են զարգացող երկրների համար 600 միլիարդ դոլար ընդհանուր գումարով հնգամյա ներդրումային ծրագրի մեկնարկի մասին՝ Չինաստանի աճող ազդեցությանը դիմակայելու համար: Այս մասին ասված է ԱՄՆ Սպիտակ տան հաղորդագրությունում, որը հրապարակվել է կիրակի՝ հունիսի 26-ին։
Ծրագիրը, որը կոչվում է «Գործընկերություն՝ հանուն գլոբալ ենթակառուցվածքների և ներդրումների», պետք է իրականացվի մինչև 2027 թվականը։ «Ուզում եմ հստակ ասել՝ սա օգնություն կամ բարեգործություն չէ: Սա ներդրում է, որն օգուտ կբերի բոլորին»,- հայտարարել է ԱՄՆ նախագահ Ջո Բայդենը՝ հավելելով, որ ծրագիրը թույլ կտա օգնություն ստացող երկրներին՝ «տեսնել ժողովրդավարական երկրների հետ գործընկերության կոնկրետ օգուտները»:
