Եվրահանձնաժողովն ընդունել է Հորդանանին մինչև 500 միլիոն դոլարի մակրոֆինանսական օգնության նոր գործողության առաջարկը: Ֆինանսական աջակցությունը Հորդանանի հետ ԵՄ գործընկերության և համերաշխության կարևոր դրսևորում է: Առաջարկվող ֆինանսական օգնությունը նպատակ ունի օգնել Հորդանանին՝ ծածկել իր արտաքին ֆինանսավորման կարիքների մի մասը, աջակցել բյուջեի համախմբման և կառուցվածքային բարեփոխումներին, որպեսզի Հորդանանի հավակնոտ բարեփոխումների ծրագիրը կարողանա շարունակվել՝ նպաստելով աշխատատեղերի ստեղծմանը, տնտեսական աճին և ներդրումներին:
Եվրահանձնաժողովի նախագահ Ուրսուլա ֆոն դեր Լյայենն ասել է. «Այսօրվա առաջարկը հստակ վկայություն է Հորդանանի հետ ԵՄ շարունակական համերաշխության մասին: Հատկացնելով մինչև 500 միլիոն դոլար՝ մենք կաջակցենք Հորդանանին քաղաքական անկայունության այս դժվարին ժամանակներում: Եվ մենք կօգնենք ապահովել Հորդանանում բարեփոխումների շարունակականությունը, որոնք ուղղված են աշխատատեղերի ստեղծմանը, տնտեսական աճին և ներդրումներին»:
