Չինաստանի նախագահ Սի Ցզինպինը մայիսի սկզբին Փարիզում կհանդիպի իր ֆրանսիացի գործընկեր Էմանուել Մակրոնի հետ, ինչը կլինի նրա առաջին ուղևորությունը Եվրոպա՝ համաճարակից հետո: Այդ մասին «POLITICO»-ին հայտնել են Փարիզի և Բրյուսելի մի քանի պաշտոնյա: Չինաստանի առաջնորդի այցը համընկնում է Փարիզի և Պեկինի միջև դիվանագիտական հարաբերությունների հաստատման 60-ամյակի հետ, քանի որ Չինաստանը ձգտում է վերականգնել Եվրոպայի հետ փչացած հարաբերությունները:
Պաշտոնյաները POLITICO-ին հայտնել են, որ Չինաստանը փորձում է համոզել Եվրոպային՝ թույլ տալ Ռուսաստանին նստել ապագա խաղաղ բանակցությունների սեղանի շուրջ, հնարավոր է՝ Շվեյցարիայում, այլապես Պեկինը կբոյկոտի նման հանդիպումները: Այս ամսվա սկզբին Չինաստանի հատուկ բանագնաց Լի Հուեյի եվրոպական շրջագայությանը անդրադառնալով՝ Չինաստանի ԱԳ նախարարությունը հայտարարել էր, որ Լին խոստացել է «աջակցել բոլոր կողմերի՝ հավասար մասնակցությամբ խաղաղության խորհրդաժողովին»:
