Նյու Յորքի Մանհեթենի քրեական դատարանը մերժել է Դոնալդ Թրամփի խնդրանքը՝ դադարեցնել պոռնոդերասանուհի Սթորմի Դենիելսին վճարելիս ֆինանսական մեքենայությունների մեղադրանքով գործի քննությունը․ հայտնում է BBC-ն։
Դատավոր Խուան Մերչանը հայտնել է, որ նախկին նախագահի նկատմամբ պատմության մեջ առաջին քրեական դատավարությունը կսկսվի մարտի 25-ին: Այդ օրը նախատեսվում է սկսել ատենակալների ժյուրիի ընտրությունը:
Թրամփի փաստաբանները փորձել են պնդել, որ գործը կարճվի կամ հետաձգվի՝ ասելով, թե Նյու Յորքի դատարանում արդար գործընթաց չի հաջողվի իրականացնել, իսկ ատենակալներն անաչառ չեն լինի:
Բացի այդ, պաշտպանական կողմը պնդում էր, որ դատավարությունը կազդի փրայմերիզների լարված սեզոնի վրա և իրականում միջամտություն կլինի ընտրություններին:
Սակայն դատավորը մերժել է այդ միջոնդությունները։
Թարմփը լրագրողների հետ զրույցում ասել է, թե հանցագործություն չի կատարել․ «Գործը պետք է քննվեր երեք տարի առաջ։ Այստեղ ոչ մի գործ չկա»։
