ԱՄՆ նախկին նախագահ Դոնալդ Թրամփը հայտարարել է, որ իր կարծիքով՝ աշխարհն այժմ «շատ մոտ է» երրորդ համաշխարհային պատերազմի բռնկմանը և որ նման իրավիճակ նախկինում երբեք չի նկատվել։ Միաժամանակ, քաղաքական գործիչը վստահություն է հայտնել, որ կկարողանա կանխել նոր համաշխարհային պատերազմի բռնկումը, եթե 2024 թվականի ընտրությունների արդյունքներով վերադառնա պետության ղեկավարի պաշտոնին։
«Չեմ կարծում, որ մենք երբևէ հայտնվել ենք երրորդ համաշխարհային պատերազմի այնպիսի վտանգի տակ, ինչպիսին հիմա է: Եվ, ինչպես անընդհատ հայտարարում եմ ամեն ելույթում, կանխելու եմ երրորդ համաշխարհային պատերազմը։ Երրորդ համաշխարհային պատերազմը, որն այժմ հնարավորինս մոտ է, ամենևին էլ նույնը չէ, ինչ առաջին և երկրորդ համաշխարհային պատերազմները։ Այդ պատերազմներն իսկապես սարսափելի էին, բայց նոր պատերազմը կարող է շատ ավելի մեծ լինել, դա կլինի ոչնչացում»,- ասել է Թրամփը Այովա նահանգում իր կողմնակիցների հանրահավաքում ելույթի ժամանակ։
Թրամփը նաև սուր քննադատության է ենթարկել ԱՄՆ ներկայիս նախագահ Ջո Բայդենին։ Նրա կարծիքով՝ Սպիտակ տան ներկայիս ղեկավարի անարդյունավետ ու ոչ կոմպետենտ քաղաքականության պատճառով ԱՄՆ-ն դադարել է հաշվի նստել միջազգային ասպարեզում։
«Ջո Բայդենը չափազանց ոչ կոմպետենտ է. միակ բանը, որ նա լավ գիտի, դա ընտրություններում խաբելն է»,- հավելել է Թրամփը։
