Միջազգային
Հյուսիսային Կորեան խզել է 2018թ. զենքի չտեղակայման համաձայնագիրը
Հինգշաբթի օրը Հյուսիսային Կորեան հայտարարել է, որ ավելի ուժեղ զինված ուժեր և նոր զինատեսակներ կտեղակայի Հարավային Կորեայի հետ սահմանին։ Պաշտոնական Սեուլը նախօրեին կասեցրել էր 2018 թվականին երկու կորեաների միջև կնքված ռազմական համաձայնագիրը՝ ի նշան Փհենյանի կողմից լրտեսական արբանյակի արձակման վերաբերյալ բողոքի:
Հյուսիսային Կորեայի պաշտպանության նախարարությունը KCNA լրատվական գործակալության տարածած հայտարարության մեջ ասել է, որ կվերականգնի բոլոր ռազմական միջոցները, որոնք դադարեցվել էին Հարավային Կորեայի հետ համաձայնագրի շրջանակներում, որը նախատեսված էր լարվածությունը ընդհանուր սահմանի երկայնքով թուլացնելու համար:
«Այսուհետ մեր բանակը երբեք կապված չի լինի սեպտեմբերի 19-ի «Հյուսիս-Հարավ» ռազմական համաձայնագրով։ Մենք հետ ենք կանչելու բոլոր ոլորտներում ռազմական լարվածությունն ու հակամարտությունը կանխելու համար ձեռնարկված ռազմական քայլերը»,- ասված է հաղորդագրությունում։
Հարավային Կորեայի պաշտոնյաները նշել են, որ վերջին արձակումը, ամենայն հավանականությամբ, հնարավոր է եղել ռուսական տեխնիկական աջակցության շրջանակներում, որի դիմաց Փհենյանը Ռուսաստանին միլիոնավոր հրետանային արկեր է մատակարարել:
Ռուսաստանը և Հյուսիսային Կորեան հերքել են զենքի հետ կապված գործարքները, սակայն խոստացել են ավելի խորը համագործակցություն, այդ թվում՝ արբանյակների հարցում:
