Միջազգային
Դիարբեքիրում 1500 տարվա վաղեմության եկեղեցու մնացորդներ են հայտնաբերվել
Թուրքիայի Դիարբեքիր քաղաքի Քուլփ թաղամասում իրականացված հնագիտական պեղումների ժամանակ հայտնաբերվել են 1500 տարվա վաղեմության եկեղեցու մնացորդներ՝ 46 գերեզմանով։ Այս մասին տեղեկացնում է Անադոլու գործակալությունը։
Դիարբեքիրի թանգարանի տնօրենի պաշտոնակատար Մյուջդաթ Գիզլիգյոլը հայտնել է, որ եկեղեցին, հավանաբար, գործել է 5-րդ, 6-րդ և 7-րդ դարերում, ապա ավերվել է և օգտագործվել որպես գերեզմանոց մինչև 13-րդ դարը։ Նշվում է, որ այն ունեցել է ուղղանկյուն հատակագիծ՝ 25 մ երկարությամբ և 15 մ լայնությամբ, եկեղեցու ներսում ճարտարապետական բլոկների վրա պատկերված են մետաղական խաչեր և խաչաձև նախշեր։
Դիարբեքիրի թանգարանի տնօրինության կողմից 2021 թվականին տարածքում սկսված պեղումները շարունակվում են 35 հոգու մասնակցությամբ, որոնցից 15-ը փորձագետներ են։ Պեղումների ընթացքում հայտնաբերվել են նաև մետաղադրամներ, նավթային լամպեր, սյուներ և դրանց հիմքերը, ինչպես նաև անհայտ կառույցի մնացորդներ։
