Միջազգային
«Ալիևին ասել եմ, որ սիոնիստական ռեժիմն Ադրբեջանի բարեկամը չէ»․ Ռայիսի
Իրանի նախագահ Էբրահիմ Ռայիսին Թեհրանում հանդիպել է Ադրբեջանի արտգործնախարար Ջեյհուն Բայրամովի հետ։
«Ավելի վաղ ես Իլհամ Ալիևին ասել եմ, որ սիոնիստական ռեժիմը ոչ ձեր, ոչ էլ որևէ մահմեդական երկրի բարեկամ չի լինելու։ Այսօր Գազայի հատվածում տիրող իրավիճակը նշան է, որպեսզի տարածաշրջանի բոլոր երկրները տեսնեն, որ ԱՄՆ-ն և Արևմուտքը չեն համակրում տարածաշրջանի երկրներին, այլ միայն հետապնդում են իրենց ռասիստական շահերը տարածաշրջանում»,- ասել է Իրանի նախագահը:
Ռայիսիի խոսքով՝ Իրանը մշտապես բանակցություններ է վարում հարևան երկրների հետ՝ տարածաշրջանային խնդիրները լուծելու համար։ Նա նաև հույս է հայտնել, որ հանդիպմանը «3+3» ձևաչափով քննարկումները կդառնան կառուցողական համագործակցության և տարածաշրջանային փոխգործակցության ամրապնդման աղբյուր։
Ռայիսին նաև ընդգծել է պաշտոնական Թեհրանի սկզբունքային դիրքորոշումը, որ տարածաշրջանային խնդիրները չեն կարող լուծվել արտաքին ուժերի միջամտությամբ, և ընդգծել է տարածաշրջանային խնդիրները տարածաշրջանի երկրների միջև սերտ փոխգործակցության և համագործակցության միջոցով լուծելու անհրաժեշտությունը։
