Միջազգային
«Մակրոնը հստակ հասկացրել է, որ մեր պաշտպանական օրակարգը զենքի շուրջ է». Ֆրանսիայի պաշտպանության նախարար
Ֆրանսիայի պաշտպանության նախարար Սեբաստիան Լըկորնյուն ֆրանսիական սենատորների հետ հանդիպմանն անդրադարձել է հայ-ֆրանսիական ռազմական գործակցությանը վերաբերող հարցերին։ Լեկորնյուն, մասնավորապես, հայտարարել է. «Հայաստանի թեմային ես շատ ուշադիր եմ հետևում։ Ես վստահելի հարաբերություններ եմ զարգացրել Հայաստանի պաշտպանության նախարարի հետ։ Մշտական պաշտպանական առաքելություն է բացվել, և մեր պաշտպանական կցորդին, որը փորձառու փոխգնդապետ է, ուզում եմ շնորհավորել նվիրվածության համար։
Երկրի ղեկավար Մակրոնը հստակ հասկացրել է, որ հայ-ֆրանսիական պաշտպանական օրակարգը կկառուցվի զենքի վաճառքի շուրջ: Որոշ զենքեր կարող են պաշտպանական բնույթ կրել և, առաջին հերթին, օգտագործվել կյանքեր պաշտպանելու և երկրի անվտանգությունը ապահովելու համար: Հաջորդ շաբաթ կապ կհաստատեմ Հայաստանի պաշտպանության նախարարի հետ, որպեսզի վերջնականապես համաձայնեցնեմ օպերատիվ և կոնկրետ միջոցառումները։ Ֆրանսիան պահպանում է կապը Հայաստանի հետ»։
