Միջազգային
Ադրբեջանը մտադիր է Լեռնային Ղարաբաղի հետ խնդիրները լուծել երկխոսության միջոցով՝ առանց երրորդ կողմի
Ֆրանսիայում Ադրբեջանի դեսպան Լեյլա Աբդուլաևան հարցազրույց է տվել ֆրանսիական France 24 հեռուստաալիքին։ Աբդուլաևան խոսել է Ադրբեջանի կողմից ԼՂ դեմ սանձազերծած ագրեսիայի, Ադրբեջանի ինտեգրացիոն պլանների և այլ հարցերի մասին։
Ձեզ ենք ներկայացնում Աբդուլաևայի հարցազրույցի ամենակարևոր հայտարարությունները.
• Ադրբեջանը սկսել է իր միջոցառումներ՝ ի պատասխան ՀՀ կառավարության կողմից աջակցվող «անօրինական զինված խմբավորումների լայնածավալ սադրանքների»։
• Հայաստանը չի կատարել 2020թ․ նոյեմբերի 9-ի եռակողմ հայտարարության համաձայն իր զինուժը դուրս բերելու պարտավորությունները։
• Անհրաժեշտ է տարբերակել Ղարաբաղի հայ բնակիչներին, որոնց մենք համարում ենք մեր քաղաքացիները, և «անօրինական զինված խմբավորումներին»։
• Ղարաբաղում իրականում ապրում է ոչ թե 120 հազար, այլ 60 հազար հայ, որից 10 հազարը «ոչ ֆորմալ, կիսառազմական ուժերի անդամներ են»։ Այս ապօրինի զինված խմբավորումների կողմից պատանդ են պահվում Ղարաբաղի խաղաղ բնակիչները։
• Ադրբեջանը տարեսկզբից նրանց հրավիրել է երկխոսության։ Ցավոք, միայն մեկ հանդիպում է կայացել, հետո Ադրբեջանի հրավերը երկու անգամ մերժվել է։ Եվլախում կայացած վերջին հանդիպումը լավատեսություն է առաջացնում։
• Ադրբեջանը մտադիր է Ղարաբաղի հայ բնակիչների հետ խնդիրները լուծել երկխոսության միջոցով և երրորդ կողմի ներգրավման անհրաժեշտություն չի տեսնում։
• Ցեղասպանության մեղադրանքները բացարձակապես անհիմն են. եթե դա այդպես է, ինչո՞ւ Հայաստանը չի բարձրացնում այդ հարցը արդարադատության միջազգային դատարանում։ Որովհետև ակնհայտորեն դա ճիշտ չէ։
