Միջազգային
«Սովորական վարժանք է, որը ոչ մի կերպ կապված չէ որևէ այլ գործունեության հետ»․ Միլլերը՝ հայ–ամերիկյան զորավարժությունների մասին
ԱՄՆ պետքարտուղարի խոսնակ Մեթյու Միլլերն անդրադարձել է հայ–ամերիկյան զորվարժություններին՝ շեշտելով, որ այն պետական գործընկերության շրջանակներում է իրականացվում և կապված չէ որևէ այլ գործողության հետ։
«Մենք պարբերաբար մարզվում և գործում ենք մեր գործընկերների հետ կողք կողքի՝ մարտական պատրաստվածությունը պահպանելու համար, և մենք շարունակաբար բարելավում ենք մեր զինված ուժերի միջև փոխգործակցությունը: Հայաստանը Միացյալ Նահանգների վաղեմի գործընկերն է և 2003 թվականից Պաշտպանության նախարարության պետական գործընկերության ծրագրի շրջանակներում ամուր հարաբերություններ է պահպանում Կանզասի ազգային գվարդիայի հետ: Այնպես որ, ոչ, դա սովորական վարժանք է, որը ոչ մի կերպ կապված չէ որևէ այլ գործունեության հետ»,– ասել է նա:
Անդրադառնալով ՌԴ արձագանքին, Միլլերը նշել է․ «Կարծում եմ, որ հաշվի առնելով, որ վերջին տարիներին Ռուսաստանը ներխուժել է իր երկու հարևանների տարածք, պետք է զերծ մնա տարածաշրջանի երկրներին անվտանգության միջոցառումների վերաբերյալ դասախոսություններ կարդալուց»:
