Միջազգային
Թուրքիայի նպատակն է «անվտանգության գոտի» ձևավորել Եվրոպայից մինչև Սև ծով, Կովկասից մինչև Մերձավոր Արևելք
Թուրքիայում ընտրական մարաթոնի հաղթողները ժողովրդավարությունն ու թուրք ժողովուրդն են։ Այս մասին հայտարարել է Թուրքիայի նախագահ Ռեջեփ Թայիփ Էրդողանը։ Նա շնորհակալություն է հայտնել բոլոր քաղաքացիներին, ովքեր ակտիվ մասնակցություն են ունեցել ընտրություններին, հայտնում է Անադոլու գործակալությունը։
«Ընտրությունների անվիճելի հաղթող եմ համարում յուրաքանչյուր քաղաքացու, ով հավատում է Թուրքիայի ազգային կամքին և ապագային, յուրաքանչյուրին, ով իրեն այս հողի մաս է համարում»,- ասել է նա։
Թուրքիայի ղեկավարն այնուհետև անդրադարձել է աշխարհաքաղաքական գործընթացներին, ինչպես նաև դրանց ազդեցությանը տարածաշրջանի վրա։ «Մեր նպատակն է «անվտանգության և խաղաղության գոտի» ձևավորել Եվրոպայից մինչև Սև ծով, Կովկասից մինչև Մերձավոր Արևելք»,- ասել է Էրդողանը։
Էրդողանը նաև նշել է, որ Թուրքիան կշարունակի ակտիվ միջնորդական ջանքերն Ուկրաինայի շուրջ հակամարտությունը կարգավորելու հարցում։ «Ուկրաինայի հարցում դիվանագիտական լուծումը հնարավոր է. դա հաստատեցին «Հացահատիկի համաձայնագրի» և գերիների փոխանակման մասին պայմանավորվածությունները։ Ամենակարևորը՝ մենք թույլ չտվեցինք, որ Թուրքիան դառնա այս հակամարտության կողմ, որը տանում է դեպի աղետ»,- շեշտել է Թուրքիայի նախագահը։
Էրդողանը վստահեցրել է, որ իշխանությունները կգործադրեն բոլոր ջանքերը՝ Թուրքիայի խնդիրների լուծման համար ընդհանուր ռազմավարություն մշակելու համար։
