Միջազգային
Ինչո՞ւ է ԱՄՆ-ն գաղտնալսել Զելենսկուն. ի՞նչ է հայտնի արտահոսած փաստաթղթերից
Վերջին շաբաթների ընթացքում համացանցում են հայտնվել մի շարք փաստաթղթեր, որոնք ենթադրաբար պատկանում են Պենտագոնի և ԱՄՆ այլ հատուկ ծառայություններին և պարունակում են գաղտնի տվյալներ՝ կապված Ուկրաինայում պատերազմի և Միացյալ Նահանգների մերձավոր դաշնակիցների մասին տեղեկատվության հավաքագրման և այլնի հետ:
Արտահոսած փաստաթղթերը ցույց են տալիս, որ ԱՄՆ-ն գաղտնալսել է Ուկրաինայի նախագահ Վլադիմիր Զելենսկու զանգերը ռազմական ղեկավարության հետ։ Գաղտնալսվել են նաև Զելենսկու նիստերն ու հանդիպումները։
Արտահոսած հետախուզական զեկույցում ասվում է, որ Զելենսկին փետրվարի վերջին առաջարկել է հարվածել Ռուսաստանի Ռոստովի մարզին՝ օգտագործելով անօդաչու թռչող սարքեր, քանի որ Ուկրաինան չունի այդ հեռահարության զենքեր: Ըստ արտահոսքի՝ պարզվում է, որ ԱՄՆ-ն հսկում և գաղտնալսում է ոչ միայն Զելենսկուն, այլև Ուկրաինայի մնացյալ ղեկավարությանը։ Ուկրաինացի պաշտոնյաները, ըստ տեղեկությունների, զայրացած են գաղտնազերծված տեղեկության պատճառով, որը Կիևին ստիպել է փոփոխություններ կատարել գարնանային հարձակման իր ծրագրերում։
