ՌԴ Անվտանգության խորհրդի փոխնախագահ Դմիտրի Մեդվեդևը վստահ է, որ Ուկրաինան կվերանա, քանի որ այն ոչ մեկին պետք չէ: Քաղաքական գործիչն այս մասին գրառում է հրապարակել VKontakte-ի իր էջում։
Նրա գրառումը վերնագրված է. «Ինչո՞ւ կվերանա Ուկրաինան, որովհետև այն ոչ մեկին պետք չէ»:
Գրառումը կազմված է վեց պարբերությունից, որտեղ Մեդվեդևը բացատրում է, թե ինչու Ուկրաինան պետք չէ Եվրոպային, ԱՄՆ-ին, Աֆրիկային, Լատինական Ամերիկային, Ասիային, Ռուսաստանին և, վերջապես, հենց Ուկրաինայի քաղաքացիներին:
Մեդվեդևը նաև ներկայիս ուկրաինական պետությունն անվանել է «ԽՍՀՄ փլուզման արդյունքում առաջացած թյուրիմացություն»: «Եվ հետևաբար, մեզ պետք չէ ենթաուկրաինան, մեզ պետք է Մեծ Ռուսաստանը», - գրել է քաղաքական գործիչը։
Ինչ վերաբերում է հենց ուկրաինացիներին, Մեդվեդևի խոսքով, նրանք «ստիպված են ապրել մշտական անհանգստության և վախի մեջ» և «ցանկանում են հեռանալ ցանկացած տեղ»: «Մոլորակի վրա ոչ մեկին նման Ուկրաինա պետք չէ, դրա համար էլ այն գոյություն չի ունենա»,- ամփոփել է հեղինակը։
