Միջազգային
Ճապոնիան կես տարվա ընդմիջումից հետո կստանա ռուսական նավթի առաջին խմբաքանակը
Ճապոնիան մոտ ժամանակներս, ավելի քան կես տարվա ընդմիջումից հետո, Ռուսաստանից կստանա նավթի առաջին խմբաքանակը։ Այս մասին հայտնել Է Bloomberg գործակալությունը՝ վկայակոչելով նավերի տեղաշարժի տվյալները։
Այն վերլուծել է նշված տեղեկատվությունը և պարզել, որ չորեքշաբթի օրը Ռուսաստանի հեռավորարևելյան «Սախալին-2» կայանում նավթով բեռնված «Զալիվ Բայկալ» լցանավն արդեն ուղևորվում է Ճապոնիա։ Գործակալությունը հիշեցնում է, որ Ճապոնիան մայիսից չէր ստացել ռուսական նավթ։
«Սախալին-2» նախագծին բաժին է ընկնում Ճապոնիայի հեղուկացված բնական գազի (LNG) սպառման գրեթե 9%-ը ։ Այս ծավալը գրեթե ամբողջությամբ գնում է երկրի էլեկտրաէներգիայի արտադրությանը՝ ապահովելով դրա 3%-ը։ Ճապոնական կառավարությունը բազմիցս հայտարարել է «Սախալին-2»-ից LNG և նավթ ստանալու հարցում շահագրգռության մասին: Ճապոնիան ԱՄՆ-ի և Եվրամիության համաձայնությամբ ժամանակավորապես դուրս է եկել Ռուսաստանից նավթի ներկրման գնային շեմի որոշումներից։
