Միջազգային
«Գազամատակարարման հետ կապված խնդիրներն առաջացել են ոչ Ադրբեջանի մեղքով»․ Բայրամով
Բաքուն պատրաստ է բազմակողմանի օգնություն ցուցաբերել Ղարաբաղիհայ բնակչությանը, եթե նման անհրաժեշտություն առաջանա, հայտարարել է Ադրբեջանի արտգործնախարար Ջեյհուն Բայրամովը։
«Ղարաբաղի հայերը ո՛չ սննդի, ո՛չ դեղորայքի խնդիր չունեն։ Բայց ադրբեջանական կողմը պատրաստ է ցանկացած օգնություն ցուցաբերել հումանիտար հարցերում, եթե դրա կարիքը լինի»,- ասել է Բայրամովը։
Միաժամանակ նա ընդգծել է, որ գազի մատակարարման հետ կապված խնդիրներն առաջացել են ոչ Ադրբեջանի մեղքով։
«Լեռնային շրջաններում ցուրտ եղանակային պայմանների հետևանքով երբեմն նման խնդիրներ են առաջանում։ Եթե տեղի բնակչությունը կապ ունենար Ադրբեջանի պետական կառույցների հետ, ապա հարցը կարող էր լուծվել։ Հիմա դրաման մեծացնելու համար խուսափում են ադրբեջանական կողմի հետ շփումներից»,- ասել է նա։
Բայրամովը հավելել է, որ ադրբեջանական կողմը չի փակել Լաչինի ճանապարհը և որ «ակցիայի նպատակն է կանխել ապօրինի գործողությունները»։
