Ռուսաստանի արտգործնախարար Սերգեյ Լավրովն իր ադրբեջանցի գործընկեր Ջեյհուն Բայրամովի հետ բանակցություններից հետո կայացած մամուլի ասուլիսում հայտարարել է, որ Մոսկվայի համար առաջնահերթ նշանակություն ունեն այն հարցերը, որոնք ծագում են ադրբեջանցի հարևանների և գործընկերների միջև պայմանավորվածությունների կատարման թեմայով։
«Ադրբեջանի պետական գերատեսչություններն աշխատում են ռուս խաղաղապահների հետ։ Մեզ համար առաջնային նշանակություն ունեն այն հարցերը, որոնք ծագում են ադրբեջանցի հարևաններից և գործընկերներից՝ եռակողմ հայտարարություններում պարունակվող պայմանավորվածությունների կատարման թեմայով։ Մեր զինվորականները տեղում ակտիվորեն զբաղվում են դրանով»,- ընդգծել է Լավրովը։
Շաբաթ օրը քաղաքացիական հագուստով մի խումբ ադրբեջանցիներ փակել էին Հայաստանն ու Լեռնային Ղարաբաղը կապող մայրուղին՝ «բնապահպանական խնդրի» պատճառաբանությամբ։ Ռուսական խաղաղապահ զորակազմի հրամանատարության բանակցությունները տևեցին մոտ երեք ժամ, և ճանապարհը բացվեց։
