Ռուսաստանն ու ԱՄՆ-ն ռիսկերի կառավարումը (հատկապես՝ միջուկային) հետախուզական գործակալությունների մակարդակով քննարկելու խողովակներ ունեն։ Այդ մասին «Ռիա Նովոստիին» ասել է Ռուսաստանում ԱՄՆ գործերի ժամանակավոր հավատարմատար Էլիզաբեթ Ռուդը։
«Հենց միջուկային ռիսկի կառավարման հարցն էր ԿՀՎ տնօրեն Բերնսի և նրա ռուս գործընկերոջ հանդիպման նպատակը»,-ասաց նա՝ հավելելով, որ հանդիպմանը չի քննարկվել Ուկրաինայի հակամարտության կարգավորման հարցը։
Նոյեմբերի 14-ին Անկարայում հանդիպել են ԿՀՎ տնօրեն Ուիլյամ Բերնսը և ՌԴ արտաքին հետախուզության ծառայության ղեկավար Սերգեյ Նարիշկինը։ Կրեմլը մանրամասնել է, որ բանակցությունները եղել են ամերիկյան կողմի նախաձեռնությամբ։
Սպիտակ տունը հայտարարել է, որ Բերնսը չի բանակցել Նարիշկինի հետ պատերազմը դադարեցնելու համար, և նրա ուղերձը վերաբերել է այն հետևանքներին, որոնք կլինեն, եթե Ռուսաստանը միջուկային զենք օգտագործի Ուկրաինայում։
