Լիբիայում ցուցարարները ներխուժել են խորհրդարանի շենք ու այրել այն։ Նրանք վրդովված են կենսապայմանների կտրուկ վատթարացմամբ, էլեկտրաէներգիայի երկարատև անջատումներով և պահանջում են երկրում նոր ընտրություններ։
Հարձակման պահին շենքում մարդիկ չեն եղել, քանի որ ուրբաթ օրը Լիբիայում հանգստյան օր է։ Խորհրդարանի շենքի տարածք հնարավոր է եղել ներթափանցել այն ժամանակ, երբ ցուցարարներից մեկը ծանր տեխնիկայի օգնությամբ քանդել է դարպասի մի մասը, այրվել են նաեւ պատգամավորների մեքենաները։
Լիբիայի խորհրդարանն արձագանքել է միջադեպին՝ հայտարարություն տարածելով, թե ճանաչում է «քաղաքացիների խաղաղ ցույցերի իրավունքը», բայց միաժամանակ դատապարտում է օրենսդիր մարմնի «վանդալիզմի և հրկիզման գործողությունները»։
