Բաքվում կայացել է Ադրբեջանի, Թուրքիայի և Ղազախստանի արտաքին գործերի և տրանսպորտի նախարարների առաջին եռակողմ հանդիպումը։ Միջոցառումը բացման ժամանակ Ադրբեջանի արտգործնախարար Ջեյհուն Բայրամովը խոսել է եռակողմ հանդիպման նշանակության մասին, ընդգծել եռակողմ և տարածաշրջանային համագործակցության կարևորությունը:
Ադրբեջանի արտգործնախարարն ասել է, որ համագործակցության շրջանակում նախատեսվում է ընդլայնել «Բաքու-Թբիլիսի-Կարս» (ԲԹԿ) միջանցքի հնարավորությունները։
«Մենք քննարկեցինք նոր իրողությունները, որոնք ի հայտ են եկել հայկական օկուպացիայից ադրբեջանական տարածքների ազատագրումից հետո։ Զանգեզուրի միջանցքը հատուկ դեր է խաղում ԵՄ երկրների, Թուրքիայի և Ասիայի ուղղությամբ երթուղու ստեղծման գործում»,- ասել է Բայրամովը։
Հանդիպման արդյունքում ստորագրվել է Բաքվի համատեղ հռչակագիրը։ Բաքվի հռչակագիրը ստորագրել են Ադրբեջանի, Թուրքիայի և Ղազախստանի արտաքին գործերի և տրանսպորտի ոլորտում պատասխանատու նախարարները։
