Միջազգային
Թուրքիայում նախագահական ընտրությունները կարող են տեղի ունենալ մեկ ամիս շուտ
Թուրքիայի նախագահական ընտրությունները, որոնք նախատեսված են 2023 թվականի հունիսին, կարող են տեղի ունենալ մեկ ամիս շուտ։ Այդ մասին հայտնում է TGRT-ն՝ վկայակոչելով Թուրքիայի նախագահ Ռեջեփ Թայիփ Էրդողանի գլխավորած իշխող «Արդարություն և զարգացում» կուսակցության (ԱԶԿ) աղբյուրները։
Հեռուստաալիքի տվյալներով՝ ԱԶԿ-ն առաջարկում է ընտրություններն անցկացնել ոչ թե հունիսի 18-ին, ինչպես նախատեսված է գործող օրենսդրությամբ, այլ մայիսի 14-ին՝ վկայակոչելով քվեարկության երկրորդ փուլի հնարավորությունը, որը, ըստ նախնական ժամկետների, տեղի կունենա հուլիսին և կարող է ընթանալ ընտրողների ցածր մասնակցությամբ՝ կապված արձակուրդային սեզոնի հետ: Մյուս կողմից, նշում է հեռուստաալիքը, ծրագրված ընտրությունների ժամկետը համընկնում է բուհական քննությունների հետ, ինչը նույնպես կարող է բացասաբար ազդել մասնակցության և քվեարկության արդյունքների վրա։ Թուրքիայի նախագահի կուսակցությունը դեռ չի մեկնաբանել ընտրությունների հնարավոր հետաձգման մասին տեղեկությունը։ Ավելի վաղ, գործող նախագահը և ԱԶԿ-ի ներկայացուցիչները հայտարարել էին, որ ընտրությունները տեղի կունենան նախատեսվածի համաձայն՝ 2023 թվականի հունիսի 18-ին։
