«Թուրքիան կշարունակի գործադրել բոլոր անհրաժեշտ ջանքերը՝ Ուկրաինայում ռազմական գործողությունները դադարեցնելու և Մոսկվայի ու Կիևի միջև կայուն խաղաղության հասնելու համար». այս մասին հայտարարել է Թուրքիայի նախագահ Ռեջեփ Թայիփ Էրդողանը՝ ելույթ ունենալով օտարերկրյա դիվանագիտական ներկայացուցչությունների ղեկավարների համար կազմակերպված ընթրիքի ժամանակ։
«Մեր երկու հարևանների միջև զինադադարի, այնուհետ՝ տևական խաղաղության հասնելը կլինի հանուն մարդկության համար արված լավագույն բաներից մեկը»,- ասել է Թուրքիայի ղեկավարը՝ հավելելով, որ կողմերը շոշափելի առաջընթաց են գրանցել բանակցություններում, «սակայն Բուչայի և Իրպինի կադրերը, Կրամատորսկի քաղաքացիական անձանց թիրախավորումը ստվեր են գցում մեր ջանքերի վրա»։
Էրդողանը նաև շեշտել է, որ Թուրքիան կշարունակի ջանքերը՝ Ստամբուլում ռուս-ուկրաինական բանակցություններում «կողմերի և միջազգային հանրության համար բավարար» արդյունքի հասնելու համար։
