Միջազգային
Թուրք-եգիպտական հարաբերություններն ինը տարվա ընդմիջումից հետո կվերականգնվեն
Թուրքիան, ինը տարվա ընդմիջումից հետո, կարող է Եգիպտոսում դեսպան նշանակել՝ երկրի հետ հարաբերությունների կարգավորման շրջանակներում: Այդ մասին հինգշաբթի օրը հայտարարել է Թուրքիայի արտգործնախարար Մեվլութ Չավուշօղլուն։
«Եգիպտոսի հետ հարաբերությունները պետք է շտկվեն: Երկու երկրներն էլ շատ կարևոր են տարածաշրջանների համար, նրանց միջև հարաբերությունների կարգավորումը կարևոր է Արևելյան Միջերկրածովի համար: Կարելի է խոսել դեսպանների փոխադարձ նշանակման մասին»,- ասել է Չավուշօղլուն՝ NTV-ին տված հարցազրույցում։
Անկարայի և Կահիրեի հարաբերությունները վատթարացան 2013 թվականի՝ Եգիպտոսի նախագահ Մուհամմեդ Մուրսիի տապալումից և Թուրքիայի կողմից Աբդել Ֆաթթահ աս-Սիսիին արաբական երկրի օրինական առաջնորդ չճանաչելուց հետո։ Միաժամանակ նրանք հետ են կանչել դեսպաններին, իսկ Կահիրեում Թուրքիայի դեսպանին «պերսոնա նոն գրատա» հայտարարելուց հետո Անկարան նույնն արեց Եգիպտոսի դիվանագիտական առաքելության ղեկավարի նկատմամբ։
Տեղական լրատվամիջոցների փոխանցմամբ՝ Եգիպտոսում Թուրքիայի նոր դեսպան կարող է նշանակվել Իսլամական համագործակցության կազմակերպությունում երկրի նախկին ներկայացուցիչ Սալիհ Մութլու Սենը։
