Ըստ քննիչների՝ 2008 թվականին Դավիթ Կեզերաշվիլին այդ գումարը փոխանցել է օֆշորային ընկերություններից մեկին՝ իբր Վրաստանում զորավարժությունների կուրս անցկացնելու համար, սակայն զորավարժություններ այդպես էլ չեն կայացել։
Թբիլիսիի քաղաքային դատարանը Վրաստանի պաշտպանության նախկին նախարար Դավիթ Կեզերաշվիլիին և պետական գնումների վարչության նախկին ղեկավար Ալեքսանդր Նինուային պարտավորեցրել է ավելի քան 5 միլիոն եվրոյի փոխհատուցում վճարել՝ պաշտպանության նախարարությանը պատճառված վնասի համար։ Այս մասին երեքշաբթի հայտնել են ՊՆ մամուլի ծառայությունից։
Գերատեսչության տվյալներով՝ խոսքը գնում է, այսպես կոչված, «զորավարժության գործով» պետական միջոցների վատնման մասին։ Ըստ քննիչների՝ 2008 թվականին նախարարը ավելի քան 5 միլիոն եվրո է փոխանցել օֆշորային ընկերություններից մեկին՝ իբր Վրաստանում զորավարժություններ անցկացնելու համար, սակայն զորավարժություններն այդպես էլ տեղի չեն ունեցել։ 2021 թվականի սեպտեմբերի 7-ին Վրաստանի Գերագույն դատարանը հեռակա կարգով Կեզերաշվիլիին դատապարտեց հինգ տարվա ազատազրկման, որից հետո պաշտպանության նախարարությունը դիմեց դատարան՝ պահանջելով փոխհատուցել վնասի համար։
Կեզերաշվիլին Վրաստանի պաշտպանության նախարարի պաշտոնը զբաղեցրել է 2006-2008թթ.՝ նախագահ Սաակաշվիլիի օրոք։ 2008-ի օգոստոսյան մարտերից հետո նա թողել է պաշտոնը և զբաղվել մասնավոր բիզնեսով։ 2012 թվականին իշխող «Վրացական երազանք» կոալիցիայի՝ իշխանության գալուց հետո նախկին նախարարի դեմ մի քանի քրեական գործ է հարուցվել։ Կեզերաշվիլին ներկայումս գտնվում է Վրաստանի սահմաններից դուրս։ Նրան հայտարարվել է հետախուզում։
