ԱՄՆ էներգետիկայի նախարարությունը թույլ է տվել՝ ավելացնել հեղուկ բնական գազի արտահանումը երկրի հարավում գտնվող տերմինալներից։ Նախարարության տված թույլտվությունները հնարավորություն կտան՝ օրական 20,4 մլն մ³-ով ավելացնել LNG-ի մատակարարումները։
ԱՄՆ-ն, ուկրաինական պատերազմի պատճառով ռուսական գազի մատակարարումից հրաժարվելու՝ եվրոպական երկրների որոշման ֆոնին, ընդլայնում է հեղուկացված բնական գազի (LNG) արտահանումը։ ԱՄՆ էներգետիկայի նախարարությունը չորեքշաբթի՝ մարտի 16-ին, երկու երկարաժամկետ թույլտվություն է տվել՝ Մեքսիկական ծոցի տերմինալներից LNG-ի լրացուցիչ ծավալների արտահանման համար. ասվում է գործակալության կայքում հրապարակված հաղորդագրության մեջ։
Այս թույլտվությունները Cheniere Energy-ին թույլ կտան՝ օրական 0,72 միլիարդ խորանարդ ֆուտ (20,4 միլիոն մ³) արտահանել Լուիզիանայի Sabine Pass տերմինալներից և Տեխասի Կորպուս Քրիստիից՝ դեպի երկրներ, որոնք չունեն ազատ առևտրի համաձայնագրեր Միացյալ Նահանգների հետ, ներառյալ՝ բոլոր եվրոպականները:
Նախկինում այս տերմինալներին թույլատրվում էր գազ արտահանել միայն ազատ առևտրի համաձայնագրեր ունեցող երկրներ, այդ թվում՝ Կանադա, Մեքսիկա, Ավստրալիա և Ասիայի, Մերձավոր Արևելքի, Կենտրոնական ու Հարավային Ամերիկայի մի շարք երկրներ։
ԱՄՆ LNG արտահանման ավելացում
«ԱՄՆ LNG-ն շարունակում է մնալ գլոբալ էներգետիկ անվտանգության կարևոր բաղադրիչ, և Էներգետիկայի նախարարությունը շարունակում է ուղիներ գտնել՝ օգնելու մեր դաշնակիցներին և առևտրային գործընկերներին մատակարարել իրենց անհրաժեշտ էներգիան», - ասել է էներգետիկայի նախարարությունը:
Զեկույցում նշվում է, որ ԱՄՆ-ն այժմ LNG-ի հիմնական արտահանողն է, իսկ ամերիկյան հեղուկ գազի արտահանումը մինչև տարեվերջ պետք է ավելանա ևս 20%-ով՝ կապված նոր հզորությունների գործարկման հետ։ Փաստաթղթում նշվում է նաև, որ հունվարին ԱՄՆ-ին բաժին է ընկել եվրոպական LNG-ի ներմուծման կեսից ավելին:
