Միջազգային
Switchblade կառավարվող հրթիռներ են ներառվել Ուկրաինային ԱՄՆ ռազմական օգնության փաթեթում. CNN
Ամերիկյան AeroVironment ընկերության Switchblade կառավարվող հրթիռները ներառվել են Վաշինգտոնի կողմից Կիևին տրամադրված ռազմական օգնության փաթեթում։ Այս մասին չորեքշաբթի հայտնել է CNN-ը՝ հղում անելով իր աղբյուրներին։
Հեռուստաընկերությունը նշում է, որ «թափառող» զինամթերքը նախկինում ներառված էր այն զենքերի ցանկում, որոնք Ուկրաինան ԱՄՆ-ից պահանջել էր հանգստյան օրերին տեղի ունեցած խորհրդակցություններից հետո։ Ինչպես հաղորդում է CNN-ը, ուկրաինացի զինվորականների կողմից Switchblade հրթիռների կիրառումը պահանջում է ամերիկյան կողմից հեռակառավարմամբ իրականացվող համապատասխան հրահանգ։
Հրթիռը երկու տարբերակ ունի՝ Switchblade 300 և Switchblade 600: Թեթև Switchblade 300-ը նախատեսված է հետևակին բարձր ճշգրտությամբ հարվածներ հասցնելու համար, մինչդեռ 600 մոդելը օգտագործվում է տանկեր և զրահամեքենաներ ոչնչացնելու համար: Նրանք նաև կոչվում են «կամիկաձե անօդաչու թռչող սարքեր»:
ԱՄՆ նախագահ Ջո Բայդենը, չորեքշաբթի օրը Սպիտակ տանը խոսելով Կիևին տրամադրվելիք ռազմական օգնության մասին, ասել է, որ ԱՄՆ իշխանությունները մտադիր են Ուկրաինային լրացուցիչ սպառազինություն փոխանցել՝ ներառյալ ՀՕՊ և հակատանկային համակարգեր, փոքր զենքեր, դրոններ։ Խոսելով անօդաչու սարքերի մասին՝ ամերիկյան առաջնորդը նկատի ուներ Switchblade-ը։ Բայդենը նաև հայտարարել է, որ ԱՄՆ-ն Ուկրաինային լրացուցիչ 800 միլիոն դոլարի ռազմական օգնություն կտրամադրի՝ այս շաբաթ այն հասցնելով մինչև 1 միլիարդ դոլարի։
