Միջազգային
Հայտնի են դարձել Ուկրաինայում կռվող 166 ռուս գեներալների ու ծովակալների անունները
«Proekt» հարթակը բացահայտել է 166 հրամանատարների անունները, որոնք մասնակցում են ռուս-ուկրաինական պատերազմին։ Նախագիծը տվյալներ է հայտնել 72 գեներալի և ծովակալի, 69 գնդապետի, 16 փոխգնդապետի և 9 այլ հրամանատարների մասին։
Հրամանատարների միայն 23%-ն է (39 մարդ), որ իրական մարտական փորձ ունի. 16-ը մասնակցել է սիրիական գործողությանը, 13-ը՝ երկրորդ չեչենական պատերազմին։
Հարթակը պարզել է, որ Ուկրաինա է ուղարկվել ավելի քան 150 զորամաս։ Սրանք Ռուսաստանի բոլոր ցամաքային ստորաբաժանումներն են՝ 11 համակցված բրիգադ և մեկ տանկային բրիգադ, հինգ օդադեսանտային հարձակման ստորաբաժանում, երկու օդադեսանտային դիվիզիա և մեկ հատուկ նշանակության ջոկատ, ԳՇ վեց հետախուզական կազմավորում, չորս նավատորմի ծովային հետևակ, հրետանու, ավիացիայի, ինչպես նաև ոստիկանության և ռուսական գվարդիայի ուժեր։
Նախագծի համաձայն՝ ներխուժմանը մասնակցում է նաև Սամարայի շրջանի 15-րդ մոտոհրաձգային բրիգադը, որը միակ ռուսական խաղաղապահ կազմավորումն է, որ կարող է ուղարկվել ՄԱԿ-ի հովանու ներքո՝ միջազգային հակամարտությունները լուծելու համար:
Ցուցակի յուրաքանչյուր ութերորդ սպան, պարզվում է, կապեր ունի Ուկրաինայի հետ։ Օրինակ, 4-րդ ռազմաօդային ուժերի և ՀՕՊ զորքերի հրամանատար, գեներալ Նիկոլայ Գոստևը ծնվել է Սումիի մարզում, 6-րդ ռազմաօդային բանակի հրամանատար Օլեգ Մակովեցկին՝ Չուգուևում, 58-րդ համակցված բանակի հրամանատար Միխայիլ Զուսկոն՝ Վոլինում։ Հատուկ նշանակության ուժերի 45-րդ առանձին բրիգադի հրամանատար Վադիմ Պանկովն էլ սովորել է Կիևում։
