Միջազգային
Ընկերությունների ակտիվների բռնագրավումը Ռուսաստանը ետ կշպրտի դեպի 1917թ.
«Այն ձեռնարկությունների ունեցվածքի բռնագրավման հարցին, որոնք հայտարարել են ռուսական շուկայից դուրս գալու մասին, պետք է շատ ուշադիր մոտենալ», - հայտարարել է «Նորիլսկի նիկելի» ղեկավար Վլադիմիր Պոտանինը։ «Սա մեզ կտանի հարյուր տարի հետ՝ 1917թ․, և նման քայլի հետևանքները՝ ներդրողների կողմից Ռուսաստանի նկատմամբ գլոբալ անվստահությունը, մենք կզգանք շատ տասնամյակներ»: Պոտանինի մատուցմամբ՝ «բազմաթիվ ընկերությունների՝ Ռուսաստանում գործունեությունը դադարեցնելու որոշումը ինչ-որ չափով զգացմունքային բնույթ ունի և կարող էր ընդունվել՝ արտերկրի հասարակական կարծիքի կողմից նրանց վրա աննախադեպ ճնշման արդյունքում: Հետևաբար, ամենայն հավանականությամբ, նրանք կվերադառնան»։
Ըստ Պոտանինի՝ ավելի համարժեք միջոց է Տնտեսական զարգացման նախարարության առաջարկը՝ նման ձեռնարկություններում ներդնել արտաքին կառավարում։ «Սա թույլ կտա սեփականատերերին՝ պահպանել իրենց ունեցվածքը, իսկ ընկերություններին՝ խուսափել փլուզումից, շարունակել արտադրությունն ու գումար վճարել աշխատակիցներին»:
«Սահմանափակումներին ի պատասխան՝ Ռուսաստանի տնտեսական միջոցները պետք է լինեն պրագմատիկ և ուղղված լինեն շուկաներում դիրքերը պահպանելուն», - կարծում է «Նորիլսկ Նիկելի» ղեկավարը։ «Շատ կարևոր եմ համարում, որ ստեղծված իրավիճակում Ռուսաստանի տնտեսական արձագանքման միջոցները լինեն կշռադատված, պրագմատիկ և ներքին տնտեսության համար լրացուցիչ դժվարությունների չհանգեցնեն: Համաշխարհային շուկաներում հիմնականում իռացիոնալ և հիստերիկ իրադարձությունների ֆոնին պետք է ամուր և հանգիստ տեսք ունենալ, և մեր ջանքերը պետք է ուղղված լինեն ոչ թե դուռը շրխկացնելուն, այլ մեր տնտեսական դիրքերը պահպանելուն՝ այն շուկաներում, որոնց մենք այսքան ժամանակ տիրապետում ենք»։
