ՊԵԿ նախագահ Ռուստամ Բադասյանն ԱԺ-ում ներկայացրել է «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքում փոփոխությունների նախագիծը։
Ըստ նրա, Հայաստանում երկար ժամանակ քննարկվում է արդար աշխատավարձի բաշխման սկզբունքը, մենք փորձ ենք անում ներդնել նոր համակարգ, որտեղ վարձատրությունը հիմնված է լինելու կատարողականի գնահատականի վրա:
«Ցանկանում ենք, որ հարկային և մաքսային ծառայողները լինեն մասնագիտական հմտություններ ունեցող: Դրա համար կարևոր է, թե նրանք ինչ վերապատրաստումներ են անցել և դրանց արդյունքում ինչ որակավորումներ ունեն: Հարկային և մաքսային ծառայությունների դեպքում գիտեք, որ հարկային և մաքսային մարմինները մասնակցում են մի շարք միջազգային կառույցների իրականացրած դասընթացներին: Ակնկալում ենք, որ այդ դասընթացներից առավել կարևորները կսահմանվեն Կառավարության ցանկով, և այդ ծրագրերին հաջողությամբ մասնակցելը և հավաստագիր ունենալը կազդի հարկային և մաքսային ծառայողների վարձատրության վրա»,- ասել է նա։
Բադասյանի խոսքով, կատարողականի գնահատման երկրորդ բաղադրիչը լինելու է աշխատողի աշխատանքի արդյունավետությունը:
Նախագծի նպատակը ՀՀ ՊԵԿ-ում կատարողականի գնահատման հիման վրա Կոմիտեի ծառայողներին հավելավճար տրամադրելու գործիքակազմ ներդնելն է` հաշվի առնելով ծառայության անցնելու գրավչությունն ու շահագրգռվածությունը մեծացնելու, ծառայողների աշխատավարձերը բարձրացնելու և կադրերի արտահոսքը կանխելու անհրաժեշտությունը:
