Քաղաքական

Ովքե՞ր են եղել ՌԴ-ում ՀՀ դեսպանները (ՖՈՏՈՌԵՊՈՐՏԱԺ)

Ապրիլի 3-ին լրացավ ՀՀ և ՌԴ միջև հաստատված դիվանագիտական հարաբերությունների 30-ամյակը։ 1992թ. ապրիլի 3-ին կնքվեց «Հայաստանի Հանրապետության և Ռուսաստանի Դաշնության միջև դիվանագիտական հարաբերություններ հաստատելու մասին» համաձայնագիրը։

Այս տարիների ընթացքում երկու պետությունների միջև ստեղծվել են սերտ դաշնակցային հարաբերություններ. կնքվել է ավելի քան 250 միջպետական, միջկառավարական և միջգերատեսչական պայմանագիր և համաձայնագիր։ Դրանցից առանցքայինը 1997թ. օգոստոսի 29-ի կնքված «Բարեկամության, համագործակցության և փոխադարձ օգնության մասին» պայմանագիրն է:

Radar Armenia-ն ներկայացնում է, թե 1991-ից ի վեր ովքեր են եղել Ռուսաստանում Հայաստանի արտակարգ և լիազոր դեսպանները։

Եվ այսպես, անկախության այս 30 տարիների ընթացքում ՀՀ-ն ՌԴ-ում ունեցել է 7 դեսպան։

Առաջին դեսպանը եղել է Յուրի Մկրտումյանը։ Նա պաշտոնավարել է 1994-1997թթ․։ Ավելի վաղ Մկրտումյանը եղել է ԵՊՀ պատմության ֆակուլտետի հնագիտության և ազգագրության ամբիոնի հիմնադիր վարիչը։ 1994թ.-ին նշանակվել է ՀՀ ԱԳ նախարարի խորհրդական, իսկ ՌԴ-ում ՀՀ դեսպանի պաշտոնից հետո վերադարձել է իր համալսարանական գործունեությանը։

ՀՀ առաջին նախագահ Լևոն Տեր-Պետրոսյանի պաշտոնավարման ընթացքում ՌԴ-ում ՀՀ հաջորդ դեսպանը եղել է Գագիկ Շահբազյանը։ Նա պաշտոնավարել է 1997-1999թթ։ Ավելի վաղ Շահբազյանն աշխատել էր որպես ՀՀ կառավարության աշխատակազմի ղեկավար, ինչպես նաև՝ համատեղության կարգով, ԵՄ-ում ՀՀ ներկայացուցչության ղեկավար։

Դեսպանի պաշտոնից ետ կանչվելուց հետո Շահբազյանը նշանակվել է ՀՀ գյուղատնտեսության նախարար։

ՌԴ-ում ՀՀ 3-րդ դեսպանը եղել է Սուրեն Սահակյանը՝ 1999-2002թթ.։ Նա ավելի ուշ նշանակվեց ՀՀ պաշտպանության փոխնախարար։

2002-2010թթ.-ին դեսպան է եղել Արմեն Սմբատյանը, ով դրանից հետո նշանակվել է ՀՀ նախագահի խորհրդական, իսկ 2018-2021թթ.՝ Իսրայելում Հայաստանի դեսպան։

Բելառուսում ՀՀ արտակարգ և լիազոր դեսպան, ԱՊՀ կանոնադրական և այլ մարմիններում ՀՀ մշտական ներկայացուցիչ Օլեգ Եսայանը ՌԴ-ում ՀՀ դեսպան է եղել 2010-2017թթ.-ին։ Ի դեպ, Եսայանը ՌԴ-ում ՀՀ դեսպաններից ամենաերկարն է պաշտոնավարել։