Քաղաքական
Դեռ փոփոխություն չկա, շարունակում ենք սպասել ռուսական խաղաղապահ զորախմբի արձագանքներին. Մարուքյան
Այս պահին դեռ փոփոխություն չկա, շարունակում ենք սպասել ռուսական խաղաղապահ զորախմբի արձագանքներին: Այս մասին Կոռնիձորում լրագրողների հետ ճեպազրույցի ժամանակ ասել է ՀՀ հատուկ հանձնարարություններով դեսպան Էդմոն Մարուքյանը՝ անդրադառնալով ՀՀ-ից Լեռնային Ղարաբաղ շուրջ 400 տոննա պարենամթերքի տեղափոխման խոչընդոտներին։
«Ադրբեջանը շուրջ 120 հազար մարդու շրջափակել և սովի է մատնում։ 21-րդ դարում նմանատիպ դեպքեր եղել են, բայց սա միջազգային մարդասիրական իրավունքի ոտնահարում է, մարդու իրավունքների զանգվածային ոտնահարում է։ Այս իմաստով, մենք որևէ քայլ չկա, որ ասենք՝ չենք արել, որ դա չապացուցենք և դա շատ ակնհայտ է։ Դուք երեկ տեսաք, որ ԱԳ-նում հավատարմագրված բոլոր դեսպանները ուսումնասիրել են, տեսել են բեռները։ Դիվանագիտական մակարդակում ամբողջական աշխատանք տարվում է, նաև հումանիտար մակարդակում։ Այս իմաստով մեր քայլերը շատ կանխատեսելի են և համահունչ են նոյեմբերի 9-ի ստանձնած մեր պարտավորություններին»,- ասել է Մարուքյանը։
Հարցին, թե այս նախաձեռնության մասին Մոսկվայում տեղի ունեցած եռակողմ հանդիպմանը ՀՀ ԱԳ նախարար Արարատ Միրզոյանը ՌԴ և Ադրբեջանի ԱԳ նախարարներին հայտնե՞լ է, Մարուքյանը պատասխանեց, որ ոչ թե կոնկրետ այդ հարցն է բարձրացվել, այլ ընդհանրապես Լաչինի միջանցքի բացվելու հարցը։
«ՀՀ ԱԳ նախարարը հանդիպման ժամանակ բարձրացրել է Լաչինի միջանցքի վերաբացման, շրջափակումը վերացնելու հարցերը՝ նոյեմբերի 9-ի պարտավորության ներքո։ Մեր նախարարը ոչ թե 360-400 տոննա բեռի հարց պետք է բարձրացնի, այլ ընդհանրապես միջանցը բացելու հարցը պետք է բարձրացնի, որը, բնականաբար, բարձրացվել է և քննարկվել է հանդիպման ժամանակ»,- ավելացրել է Մարուքյանը։
