Քաղաքական
ԱԺ-ում քննարկվում է ՆԳ նախարարության ստեղծման վերաբերյալ նախագիծը (ՏԵՍԱՆՅՈՒԹ)
ԱԺ-ն երկրորդ ընթերցմամբ քննարկում է «Կառավարության կառուցվածքի և գործունեության մասին» օրենքում փոփոխությունների նախագիծը, որի ընդունումից հետո նախատեսվում է Հայաստանում ստեղծել Ներքին գործերի նախարարություն։
ՀՀ արդարադատության փոխնախարար Արփինե Սարգսյանը ներկայացրեց առաջինից երկրորդ ընթերցման ընթացքում ընդունված փոփոխությունները՝ շեշտելով, որ որոշվել է առաջարկներ ընդունել միայն գրավոր ընթացակարգով։ Ըստ փոխնախարարի՝ օրենսդրական փաթեթով ՆԳՆ ֆունկցիոնալ բազայից հանվել է աշխատանքի միգրացիայի ոլորտում քաղաքականության մշակման հատվածը. «ՆԳՆ ֆունկցիոնալ բազայից հանվել է աշխատանքի միգրացիայի ոլորտում քաղաքականության մշակման հատվածը: Ամեն դեպքում, կառավարությունը գտնում է, որ աշխատանքի ոլորտում քաղաքականությունը պետք է շարունակի մշակել Աշխատանքի և սոցիալական հարցերի նախարարությունը, իսկ Ներքին գործերի նախարարությունն ընդամենը կօժանդակի տարբեր պրոցեսների կատարմանը:
Կառավարությունը պարզապես նոր նախարարության ստեղծման փաթեթ չի ներկայացրել այսօր․ մենք կտեսնենք թե՛ փրկարար ծառայության, թե՛ ոստիկանության և թե՛ միգրացիայի ու քաղաքացիության ծառայության ոլորտում որակական փոփոխությունների իրականացում»։
Ըստ փոխնախարարի՝ նաև առաջարկ է եղել ոստիկանների մահակի տեխնիկական բնութագրերը սահմանելու կառավարության որոշմամբ, որպեսզի որևէ առերևույթ մտահոգություն այդ թեմայով չլինի․ «Վերահաստատում եմ մոտեցումը, որ մահակը լինի այնպիսին, որ բավարարի մարդու իրավունքների պաշտպանության բարձր ստանդարտներին»։
