Կառավարության այսօրվա նիստում ՀՀ վարչապետ Նիկոլ Փաշինյանը հայտարարել էր, որ Ադրբեջանի կողմից իր իսկ ստանձնած պարտավորությունների խրոնիկ խախտումները միջազգային պատշաճ գնահատականի արժանացնելը մեր հիմնական հավաքական աշխատանքը պետք է լինի: Վարչապետը դիվանագիտական ծառայությանը, բոլոր գերատեսչությունների արտաքին կապերի ստորաբաժանումներին, խորհրդարանական դիվանագիտությանը, կառավարող ուժին, ընդդիմությանը, հկ-ներին, սփյուռքի ներկայացուցիչներին, արտաքին կապեր ունեցող ֆիզիկական և իրավաբանական անձանց, սոցցանցերի օգտատերերին հորդորեց իրենց լուման ներդնեն այս գործում՝ ի ցույց դնելու, որ Ադրբեջանի կողմից 2020 թվականի եռակողմ հայտարարության պարբերական խախտումները նախևառաջ Լեռնային Ղարաբաղը ցեղասպանության կամ հայրենազրկման ենթարկելու նպատակ ունեն:
ԱԺ «Հայաստան» խմբակցության պատգամավոր Գեղամ Մանուկյանը Radar Armenia-ի հետ զրույցում անդրադառնալով վարչապետի հորդորին՝ ասաց, թե ավելի լավ կլիներ նման կոչն արվեր իշխանական խմբակցության պատգամավորներին։ Ըստ Մանուկյանի. «Թող իրենց խմբակցությունը ԱԺ-ում անատամ հայտարարություն չընդունի։ Շատ ավելի մեծ գործ արած կլինի»։
Մանուկյանի խոսքով՝ «Նիկոլ Փաշինյանը չէ, որ պետք է խորհուրդ տա և կոչ անի ընդդիմությանն՝ ինչ անել, հատկապես՝ դաշնակցությանը, որը որևէ վայրկյան մեր ժողովրդի և արցախահայության իրավունքների պաշտպանության գործում դադար չի վերցրել»։
Ընդդիմադիր պատգամավորից հետաքրքրվեցինք՝ իսկ ի՞նչ է անում խորհրդարանական ընդդիմությունը. «Սա ամեն վայրկյանի, տևական, համակարգված աշխատանք է, ոչ թե լոկ սեփական PR-ի մասին մտածելով գործունեություն ծավալելու, սեփական հաճույքները վայելելու, ինչպես այս իշխանության դեպքում է»,- ասաց Գեղամ Մանուկյանը։
Հայկ Մագոյան
