Մամուլում շրջանառվող տեղեկությունների համաձայն՝ ՀՀ գլխավոր դատախազ Աննա Վարդապետյանն առաջիկայում կդիմի խորհրդարան՝ «Հայաստան» խմբակցության ղեկավար Սեյրան Օհանյանի, նույն խմբակցության պատգամավորներ Վահե Հակոբյանի և Արմեն Չարչյանի նկատմամբ մեղադրանք առաջադրելու և կալանավորելու միջնորդությամբ:
Radar Armenia-ի հետ զրույցում մեկնաբանելով շրջանառվող տեղեկությունները՝ Սեյրան Օհանյանն ասաց, թե չգիտի՝ այդ հրապարակումներն ինչ նպատակ են հետապնդում. «Պետք է իրենցից հարցնել։ Ճիշտ է՝ ես պատգամավոր եմ, անձեռնմխելի անձ եմ, բայց իմ ողջ կյանքում երբևէ այդ անձեռնմխելիությունից կախված չեմ եղել։ Ես ազատ անձ եմ։ Այնպես որ, չգիտեմ՝ ինչն է պատճառը։ Հավանական է՝ դա կարող է կապված լինել նաև իմ քաղաքական գործունեության հետ»։
Պաշտպանության նախկին նախարարից հետաքրքրվեցինք՝ մեղադրանք առաջադրելու, կալանավորելու, պատգամավորական անձեռմնխելիությունից զրկելու հիմքեր կա՞ն։ Սերյան Օհանյանը պատասխանեց՝ «Չգիտեմ...չկան»։
ՀՀ գլխավոր դատախազությունից էլ Radar Armenia-ին փոխանցեցին, որ գլխավոր դատախազությունում նշված անձանց վերաբերյալ այս պահին որևէ միջնորդություն առկա չէ։
Հայկ Մագոյան
