Քաղաքական
Ես չեմ տեսնում, որ Կրեմլը միջանցքի հարց է առաջ քաշում. Սեյրան Օհանյան
ԱԺ «Հայաստան» խմբակցության ղեկավար Սեյրան Օհանյանն այսօր լրագրողների հետ ճեպազրույցում հայտարարել է, թե իր կարծիքով Մոսկվայի կողմից ճնշումներ կան Հայաստանի վրա՝ այսպես կոչված «Զանգեզուրի միջանցք» տալու հարցում ճնշումներ չկան:
Սեյրան Օհանյանի խոսքով. «Ես չեմ տեսնում, որ Կրեմլը միջանցքի հարց է առաջ քաշում, գործողություններ են ընթանում ենթակառույցների, ճանապարհների բացման ուղղությամբ։ Ընդհակառակը, մենք տեսնում ենք, որ նետել երկիրն այս կամ այն թևերի կենտրոն, այս կամ այն թևերի շփման հատված, այդ ամենն է թույլ տալիս, որ Հայաստանի վրա ճնշումները շարունակվեն, մանավանդ, որ մենք երկու բանաձևերի մեջ տեսնում ենք, որ Արևմուտքից մեզ տրամադրված բանաձևը տանում է նրան, որ վերջնականապես կկորցնենք Արցախը»։
Նա խոսել է նաև ընդդիմության գործողությունների մասին, նշելով. «Իհարկե, ժողովրդի հետ աշխատանքը, համոզման գործընթացը, ամենադժվարն է: Շատ դժվար է մարդկանց համոզել մի իրականության մեջ, երբ մարդկանց մի մասը մանիպուլացված է, մի մասն անտարբեր է, համակերպվել է այս ամենին, մի մասը վախենում է, որ նորից պատերազմ կսկսվի: Բայց երկրագնդի վրա չկա մի երկիր ու ազգ, որ իր պատմությունը կերտելու համար մարտնչած չլինի: Այդ առումով «Դիմադրության» շարժումը շարունակական է լինելու»:
Ըստ Օհանյանի, իրենք նախորդ շարժման ժամանակ կարողացան թույլ չտալ, որ ժամանակից շուտ փաստաթղթեր ստորագրվեն. «Բայց դա բավարար չէր: Ինքներս էլ դա տեսնում ենք, հիմա որոշակի վերլուծություն ենք անում, ապագայում մեր գործողություններում կլինեն նորարարություններ»,-ասել է նա
