Քաղաքական
Ինչո՞ւ ՀՀ նախկին նախագահները չեն մասնակցել «Հայաստան» համահայկական հիմնադրամի Հոգաբարձուների խորհրդի նիստին
Օրերս «Հայաստան» համահայկական հիմնադրամն ամփոփեց 2021թ.-ի գործունեությունը։ Միջոցառմանը ներկա էին ՀՀ վարչապետ Նիկոլ Փաշինյանը, ՀՀ նախագահ Վահագն Խաչատուրյանը, Արցախի նախագահ Արայիկ Հարությունյանը և խորհրդի այլ անդամներ։
«Հայաստան» համահայկական հիմնադրամը ստեղծվել է Հայաստանի առաջին նախագահ Լևոն Տեր-Պետրոսյանի հրամանագրով՝ 1992թ.-ի գարնանը։ Նպատակը համահայկական ցանց ստեղծելն էր, Հայաստանին և աշխարհի հայերին աջակցելը, Հայաստանի և Արցախի կայուն ու համաչափ զարգացումը ապահովող ծրագրեր իրականացնելը։
«Հայաստան» համահայկական հիմնադրամի բարձրագույն ղեկավար մարմինը Հոգաբարձուների խորհուրդն է: Հիմնադրամի կանոնադրության համաձայն` ՀՀ նախագահն ի պաշտոնե Հոգաբարձուների խորհրդի նախագահն է: Խորհրդի կազմում են կառավարական, եկեղեցական, կուսակցական, հասարակական և բարեգործական կառույցների ներկայացուցիչներ: Խորհուրդը հրավիրում է տարեկան ժողով, որին մասնակցում են հոգաբարձուները, տեղական մարմինների և գործադիր վարչության ներկայացուցիչները:
Հոգաբարձուների խորհրդի այս տարվա նիստին ներկա էր խորհրդի 23 անդամ, որից 5-ը մասնակցում էր հեռավար կարգով։ Նիստին մասնակցում էր նաև հիմնադրամի տեղական մարմինների 25 ներկայացուցիչ, որից 22-ը՝ հեռավար։ Մասնակցում էին նաև հիմնադրամի գործադիր տնօրեն Հայկակ Արշամյանը և գործադիր վարչության ներկայացուցիչները։
Radar Armenia-ի հետ զրույցում «Հայաստան» համահայկական հիմնադրամի գործադիր տնօրենի խորհրդական Հայկ Սայադյանը տեղեկացրեց՝ տարեկան նիստին մասնակցելու հրավեր ուղարկվել է ՀՀ բոլոր նախագահներին։
Նիստին ներկա չի եղել ՀՀ առաջին նախագահ Լևոն Տեր-Պետրոսյանը։ Մեզ հետ զրույցում առաջին նախագահի մամուլի խոսնակ Արման Մուսինյանը նշեց. «Նախագահ Տեր-Պետրոսյանը 1998թ. հրաժարական տալուց հետո «Հայաստան» համահայկական հիմնադրամի Հոգաբարձուների խորհրդի որևէ նիստի չի մասնակցել»։
ՀՀ երկրորդ նախագահ Ռոբերտ Քոչարյանը ևս հրաժարվել է ընդգրկվել հիմնադրամի հոգաբարձուների խորհրդի կազմում։ Քոչարյանի գրասենյակի համակարգող Բագրատ Միկոյանը մանրամասնեց. «Նախագահ Քոչարյանը հրաժարվել է ընդգրկվել հիմնադրամի հոգաբարձուների խորհրդի կազմում՝ կապված հիմնադրամի կողմից վերջին ժամանակահատվածում ֆինանսական թափանցիկության, վստահելիության և հաշվետվողականության կորստի հետ»:
ՀՀ երրորդ նախագահ Սերժ Սարգսյանը նույնպես չի մասնակցել հիմնադրամի խորհրդի նիստին, քանի որ օրեր առաջ իր անհամաձայնությունն էր հայտնել հոգաբարձուների խորհրդի անդամ լինելու առաջարկին:
«Հայաստան» հիմնադրամի Հոգաբարձուների խորհրդի տարեկան 31-րդ նիստին ներկա չեն եղել նաև Արցախի պաշտոնաթող նախագահներ Արկադի Ղուկասյանը և Բակո Սահակյանը, Ն.Ս.Օ.Տ.Տ. Գարեգին Բ Ամենայն հայոց կաթողիկոսը, ռուսաստանաբնակ գործարար Սամվել Կարապետյանն ու արգենտինահայ գործարար Էդուարդո Էռնեկյանը։
Անուշ Մկրտչյան
