Նոր Զելանդիայի արտաքին գործերի նախարարությունը հորդորել է իր քաղաքացիներին շտապ լքել Ուկրաինայի տարածքը։
Գերատեսչության հրապարակած հայտարարության մեջ այս քայլը բացատրվում է «Ռուսաստանի և Ուկրաինայի միջև աճող լարվածությամբ»։
Ավստրալիայի վարչապետ Սքոթ Մորիսոնը նման կոչով դիմել է իր քաղաքացիներին։ Ավստրալական լրատվամիջոցների փոխանցմամբ՝ նա Ուկրաինայում ստեղծված իրավիճակը «շատ վտանգավոր» է անվանել։
Բացի այդ, Կիևից դեսպանատան աշխատակիցներին տարհանել է Միացյալ Թագավորության արտաքին գործերի գերատեսչությունը: Բաց կմնա միայն Կիևում դեսպանությունը, սակայն չի կարողանա անձնական հյուպատոսական ծառայություն իրականացնել:
Իսրայելը ևս սկսել է դիվանագետների ընտանիքների տարհանումը Կիևից: Բացի այդ, Իսրայելի իշխանությունները խորհուրդ են տվել Ուկրաինայում բնակվող Իսրայելի քաղաքացիներին չմոտենալ «թեժ կետերին», իսկ Ուկրաինա այց ծրագրողներին՝ հրաժարվել դրանից:
Փետրվարի 11-ին էլ Նորվեգիայի ԱԳՆ-ն իր քաղաքացիներին կոչ էր արել լքել Ուկրաինան, Հարավային Կորեայի իշխանությունները որոշել են փետրվարի 13-ից արգելել իրենց քաղաքացիներին մեկնել այդ երկիր, այնտեղ գտնվողներին էլ կոչ են արել անհապաղ լքել երկիրը: Նիդերլանդների և Լատվիայի իշխանությունները ևս իրենց քաղաքացիներին խորհուրդ են տվել հեռանալ Ուկրաինայից:
Ավելի վաղ տեղեկացրել էինք, որ ԱՄՆ ազգային անվտանգության հարցերով խորհրդական Ջեյք Սալիվանը նույնպես առաջարկել էր, որ բոլոր ամերիկացիները լքեն Ուկրաինան առաջիկա 24-48 ժամվա ընթացքում։
