Քաղաքական
«Գիտեմ, որ շատ մարդիկ ասելու են, որ այս ծանր պահին դատավորների աշխատավարձ եք բարձրացնում». Ն. Փաշինյան
Կառավարությունը հավանություն տվեց «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» և «Պաշտոնատար անձանց գործունեության ապահովման, սպասարկման և սոցիալական երաշխիքների մասին» օրենքներում փոփոխությունների նախագծերին:
Ակնկալվում է Սահմանադրական դատարանի դատավորի, փոխնախագահի և նախագահի հավելավճարը սահմանել 80%-ի չափով, իսկ Վճռաբեկ դատարանի դատավորների (այդ թվում՝ նախագահի և պալատի նախագահի) համար սահմանել պաշտոնային դրույքաչափի 50%-ի չափով հավելում:
Արդարադատության փոխնախարար Գրիգոր Մինասյանը հայտարարեց, որ Վճռաբեկ դատարանի և ՍԴ դատավորների համար սահմանված վարձատրության չափը չի համապատասխանում վերջիններիս կարգավիճակին և պատասխանատվությանը, ինչի համար էլ առաջարկվում է ավելացնել նրանց վարձատրությունը՝ նրանց տրամադրվող հավելումներն ու հավելավճարները վերանայելու միջոցով։
ՀՀ վարչապետ Նիկոլ Փաշինյանն էլ, անդրադառնալով որոշմանը, նշեց. «Գիտեմ՝ մեր քաղաքացիների մեծ մասի արձագանքն ինչպիսին է լինելու այս նախագծին։ Ասելու են՝ այս ծանր սոցիալական վիճակում դատավորների և ՍԴ դատավորների աշխատավարձն եք բարձրացնում: Այս որոշումները կայացնում ենք, առաջին հերթին, ոչ թե հանուն դատավորների, այլ հանուն այն քաղաքացիների, որոնք առնչվում են այդ դատարանների հետ, որովհետև արդարությունը և պատշաճ արդարադատությունն ամենակարևոր հնարավորությունն են, որ պետք է ունենանք երկրում։ Ուզում ենք՝ ՀՀ-ում լինի այնպիսի դատական համակարգ, որը նայում է մարդկանց աչքերին, ոչ թե ձեռքերին»։
