ՀՀ ԱԳ նախարար Արարատ Միրզոյանի՝ Բրյուսել կատարած աշխատանքային այցի ընթացքում Երևանն ու Բրյուսելը կքննարկեն վիզաների ազատականացման շուրջ երկխոսություն սկսելու հեռանկարները։ Քննարկումը տեղի կունենա մայիսի 18-ին կայանալիք Հայաստան-Եվրամիություն գործընկերության խորհրդի չորրորդ հանդիպմանը։
Արևելյան գործընկերության քաղաքացիական հասարակության ֆորումի անդամ, Խոսքի ազատության պաշտպանության կոմիտեի նախագահ Աշոտ Մելիքյանը, Radar Armenia-ի հետ զրույցում անդրադառնալով սպասվող հանդիպմանն ու հարցին, թե մինչ այս վիզաների ազատականացման գործընթացում ինչ առաջընթաց է ապահովվել, ասաց. «Առայժմ լուրջ առաջընթաց չի արձանագրվել, թեպետ բանակցությունների ընթացքում նախանշվել էին քայլեր, որոնք պետք է ավելի դյուրին դարձնեին վիզաների տրամադրումը։ Որոշ քայլեր արվել են, բայց դրանք շատ քիչ են, ճանապարհի սկիզբն են։ Պետք է հաշվի առնել, որ կորոնավիրուսային համավարակը շատ լուրջ խոչընդոտ էր այս գործընթացի համար։ Երկրները մտցնում էին տարատեսակ սահմանափակումներ, որոնք բխում էին անվտանգության հարցերից և համավարակին դիմակայելու անհրաժեշտությունից»։
Ըստ Մելիքյանի՝ այդ ամենին խոչընդոտեցին նաև ռուս-ուկրաինական ռազմական գործողությունները. «Պատերազմը, որն սկսվեց Ուկրաինայի դեմ, նույնպես լուրջ խոչընդոտ է գործընթացի համար։ Այդուհանդերձ, եթե այսօրվա պայմաններում հնարավորություն է ստեղծվում շարունակել բանակցությունները, թե ինչպես կարելի է գործընթացն առաջ տանել, դա շատ կարևոր է, մանավանդ, որ այդ ամենը համահունչ է ՀՀ-Եվրամիություն պայմանագրին։ Մեզ համար կարևոր և ուրախալի կլինի այս գործընթացում առաջընթաց գրանցել»։
Անդրադառնալով իշխանության պնդումներին, թե ՀՀ-ն ժողովրդավարության տարբեր չափանիշներով բարելավում է իր դիրքերը, և հարցին՝ դա կարո՞ղ է նպաստել նշված գործընթացի՝ ավելի արդյունավետ և արագ իրականացմանը, Մելիքյանն ասաց. «Բոլոր փոփոխությունները պետք է համահունչ լինեն միջազգային ընդունված նորմերին, որ տեսանելի լինեն Արևմտյան գործընկերների համար։ Իհարկե, հեղափոխությունը շատ մեծ հեռանկարներ էր բացում ՀՀ-ի ժողովրդավարական զարգացման համար, բայց տարբեր օբյեկտիվ և սուբյեկտիվ պատճառներ՝ տարածաշրջանային զարգացումներ, պատերազմ, հակամարտություն ներքաղաքական դաշտում, իշխանությունների կողմից ոչ լիարժեք քայլեր՝ ուղղված ժողովրդավարության զարգացմանը և ներքին հասարակական-քաղաքական կյանքը կայունացնելուն, խոչընդոտեցին դրան»։
Նրա կարծիքով՝ իշխանությունը շատ անելիք ունի՝ հաստատելու իր պատրաստակամությունը՝ ժողովրդավարական բարեփոխումներին հարազատ մնալու և այն առաջ տանելու համար։ «Հայաստանի քաղաքացիների, քաղաքական ուժերի, տարբեր ոլորտների մասնագետների շփումները Եվրամիության երկրների, ԵՄ-ի հետ շատ օգտակար կարող են լինել ժողովրդավարացման զարգացման համար, ինչը նաև կնպաստի վիզաների տրամադրման հեշտացման գործընթացին»։
Մարիամ Սարգսյան
