Քաղաքական
Կառավարության որոշմամբ մայիսի 1-ից ՀՀ տարածք մուտք գործելու սահմանափակումները կվերացվեն
ՀՀ առողջապահության նախարար Անահիտ Ավանեսյանը կառավարության նիստին ներկայացրեց համավարակով պայմանավորված որոշ սահմանափակումների վերացման նախագիծը։
Կառավարության որոշմամբ՝ մայիսի 1-ից ՀՀ տարածք մուտք գործելու սահմանափակումները կվերացվեն։
Ուժը կորցրած է ճանաչվել օդային և ցամաքային սահմանային անցման կետերով մուտք գործելիս COVID-19 ախտորոշման ՊՇՌ հետազոտության բացասական արդյունքը հավաստող, առավելագույնը 72 ժամ վաղեմության սերտիֆիկատ կամ արագ ախտորոշիչ թեստի 24 ժամ վաղեմության բացասական արդյունքը հավաստող սերտիֆիկատ ներկայացնելու պահանջը:
Առողջապահության նախարար Անահիտ Ավանեսյանը նշեց, որ վերջին 14 օրում արձանագրվել է կորոնավիրուսային հիվանդության ընդամենը 144 նոր դեպք, ինչը նախորդ տարվա նույն ժամանակահատվածի համեմատ նվազել է 32 տոկոսով։
Նրա խոսքով՝ վերջին ամսում նկատվել է նաև մահվան դեպքերի նվազում, 14 օրվա ընթացքում գրանցվել է մահվան 1 դեպք։
Այսպիսով՝ հանվում է պետական սահմանի ցամաքային և օդանավակայաններում տեղակայված անցակետերով մուտք գործելիս ՊՇՌ թեստերի հետազոտության սերտիֆիկատ և պատվաստման սերտիֆիկատ ներկայացնելու պահանջը։
Հանվել են նաև քրեակատարողական հիմնարկներում և ԶՈւ-ում սահմանափակումները, ինչի արդյունքում արձակուրդ մեկնելիս կամ տեսակցության ժամանակ չի գործի թեստավորման կամ պատվաստման սերտիֆիկատի պահանջը։
Վերացվում է նաև աշխատավայրերում 7 օրը մեկ թեստի բացասական պատասխան ներկայացնելու պահանջը։
