Քաղաքական
Արցախի բռնակցումն Ադրբեջանին կբերի Արցախի ոչնչացման, նման քննարկումն անընդունելի է․ Արցախի ԱԺ նախագահ
Արցախը երբեք չի եղել ու չի լինելու Ադրբեջանի կազմում, և դրա շուրջ ցանկացած քննարկում մեզ համար անընդունելի է։ Այս մասին Արցախի Հանրապետության ԱԺ արտահերթ նիստի ընթացքում հայտարարել է ԱՀ ԱԺ նախագահ Արթուր Թովմասյանը։
«Դա կարմիր գիծն է, որը որևէ մեկն իրավունք չունի խախտել։ Արցախի բռնակցումն Ադրբեջանին կբերի Արցախի ոչնչացման և կհանդիսանա աշխարհաքաղաքական, պատմական և բարոյական ողբերգություն հայոց պետականության և հայ ժողովրդի համար։ Արցախի ժողովուրդը հաստատակամ է և չի շեղվելու իր ընտրած ուղուց։
Մենք չափազանց թանկ գին ենք վճարել մեր ազատության և անկախության համար։ Եվ մեր պատմությունն անարժան ձևով փակելու բարոյական իրավունք չունեք»,- ասաց նա, ինչից հետո ԱՀ խորհրդարանի պատգամավորները մեկ րոպե լռությամբ հարգեցին Արցախի պաշտպանության համար զոհվածների հիշատակը։
