Քաղաքական
Կա պատկերացում, որ հայ պատանդների հերթական խումբը պետք է ազատ արձակվի. ԱԳ նախարար
ՀՀ ԱԳ նախարար Արարատ Միրզոյանը կառավարության հետ հարցուպատասխանի ժամանակ հայտարարել է, թե անհետ կորածների, գերիների ու պահվող անձանց թեման քննարկվել է ՀՀ վարչապետի, Ադրբեջանի նախագահի և Եվրոպական խորհրդի նախագահի բրյուսելյան հանդիպմանը, կա պատկերացում, որ հայ պատանդների հերթական խումբը պետք է ազատ արձակվի:
Նրա խոսքով. «Մենք հիմա շարունակում ենք բանակցել դրա շուրջ»։
Արարատ Միրզոյանը շեշտեց, որ Ադրբեջանը մինչև օրս չի կատարել նոյեմբերի 9-ի եռակողմ հայտարարությամբ ստանձնած պարտավորությունը, այն է՝ անհապաղ ազատ արձակել բոլոր ռազմագերիներին, պատանդներին և այլ պահվող անձանց. «Տարբեր պատրվակներով բերելով՝ Ադրբեջանը փորձում է խնդիրը կապել Ղարաբաղյան առաջին պատերազմում անհետ կորած անձանց փնտրելու հարցի հետ: Այդ հարցերն ընդհանրապես իրար հետ կապ չունեն, այնուամենայնիվ, մենք որպես բարի կամքի նշան արել ենք ու շարունակում ենք անել մեր մարդասիրական քայլերը: Ակնկալում ենք, որ նույնպիսին էլ պիտի լինի Ադրբեջանի պահվածքը և՛ մարդասիրական նկատառումներից ելնելով, և՛ որ ուղղակի դա իրենց պարտավորությունն է թղթի վրա գրված»։
