Օրերս ՀՀ վարչապետ Նիկոլ Փաշինյանը «Լուսավոր Հայաստան» կուսակցության նախագահ, նախկին պատգամավոր Էդմոն Մարուքյանին նշանակեց հատուկ հանձնարարություններով դեսպան։

Դիվանագիտական ծառայության մասին օրենքի 16-րդ հոդվածի համաձայն՝ միջազգային հարաբերություններում որոշակի խնդիրներ լուծելու նպատակով վարչապետը կարող է նշանակել հատուկ հանձնարարություններով դեսպան, կամ, կառավարության որոշմամբ, կարող են ստեղծվել հատուկ առաքելություններ, որոնց կազմում կարող են ընդգրկվել ինչպես դիվանագետներ, այնպես էլ՝ այլ անձինք:

Radar Armenia-ն ներկայացնում է, թե ՀՀ անկախությությունից ի վեր ովքեր են եղել հատուկ հանձնարարություններով դեսպաններ։

ՀՀ ԱԳՆ-ից տեղեկացանք, որ ՀՀ պատմության ընթացքում 14 նման դեսպան ենք ունեցել։

Հատուկ հանձնարարություններով առաջին դեսպանը եղել է երգիչ Շառլ Ազնավուրը։ Նրան այդ տիտղոսը շնորհվել է 1993 թվականից՝ առաջին նախագահ Լևոն Տեր-Պետրոսյանի օրոք։ Ազնավուրը հատուկ հանձնարարություններով դեսպան է եղել՝ մինչև կյանքի ավարտը։

ՀՀ առաջին նախագահի պաշտոնավարման ընթացքում հատուկ հանձնարարություններով դեսպաններ են եղել նաև Ազգային անվտանգության վարչության նախկին պետ Դավիթ Շահնազարյանը (որպես հատուկ հանձնարարություններով դեսպան պաշտոնավարել է 1993-1995թթ., եղել է նաև ԼՂ հակամարտության կարգավորման բանակցություններում ՀՀ նախագահի հատուկ ներկայացուցիչ)։

ԱԳ նախկին փոխնախարար Ժիրայր Լիպարիտյանը ևս եղել է հատուկ հանձնարարություններով ՀՀ դեսպան. պաշտոնավարել է 1994-1997թթ․։ 

Տեր-Պետրոսյանի պաշտոնավարման տարիներին ՀՀ նախկին վարչապետ Արմեն Սարգսյանն էլ որպես հատուկ հանձնարարություններով դեսպան պաշտոնավարել է 1997-1998 թթ․:

ՀՀ երկրորդ նախագահ Ռոբերտ Քոչարյանի պաշտոնավարման ընթացքում հատուկ հանձնարարություններով դեսպան է եղել Աշոտ Մելիք-Շահնազարյանը՝ 1998-2000թթ․։ Այնուհետ նա նշանակվել է Մեքսիկայում և Կուբայում ՀՀ դեսպան։

1999-2003թթ․ հատուկ հանձնարարություններով դեսպան է եղել Լևոն Խաչատրյանը, ով այնուհետև նշանակվել է ՌԴ-ում ՀՀ դեսպանության արտակարգ դեսպանորդ և լիազոր նախարար, ապա՝ Ղազախստանում ու Ղրղզստանում ՀՀ դեսպան։

Սպարտակ Կոստանյանը, ով մինչ այդ Բելառուսում ՀՀ դեսպանն էր, հատուկ հանձնարարություններով դեսպանի պաշտոնն զբաղեցրել է 1999-2008թթ.։ 

Սիրիայում ՀՀ գործերի նախկին հավատարմատար Դավիթ Հովհաննիսյանն արդեն 1999-2002թթ․ եղել է հատուկ հանձնարարություններով դեսպան։

ԼՂՀ ԱԳ նախարար Արման Մելիքյանը հատուկ հանձնարարություններով դեսպան է եղել 1999-2001թթ.։

2009-ին՝ ՀՀ երրորդ նախագահ Սերժ Սարգսյանի օրոք, հատուկ հանձնարարություններով դեսպան է նշանակվել ԼՂՀ երկրորդ նախագահ Արկադի Ղուկասյանը։

2010-2018թթ․ հատուկ հանձնարարություններով դեսպան է եղել Սիրիայում ՀՀ նախկին դեսպան Լևոն Սարգսյանը։ Վերջինս երրորդ նախագահի եղբայրն է։

Վարչապետ Նիկոլ Փաշինյանի պաշտոնավարման օրոք՝ 2019-ին, հատուկ հանձնարարություններով դեսպան է նշանակվել 2012-2018թթ. ԼՂՀ ԱԳ նախարար Կարեն Միրզոյանը։ Վերջինս պաշտոնավարել է մինչև 2020-ը։

Այժմ, Էդմոն Մարուքյանից բացի, հատուկ հանձնարարություններով դեսպան է նաև ՀՀ ԿԲ նախկին նախագահ Արթուր Ջավադյանը։

Մարիամ Սարգսյան